Ólöf Tara fæddist í Reykjavík 9.mars 1990 og lést fyrir eigin hendi 30.janúar 2025.
Ólöf Tara var heilbrigt og brosmilt barn. Hún var fljót til alls, að ganga og orðin altalandi innan við tveggja ára. Hún var alla tíð fljót að læra og muna texta þó svo þeir væru langir. Hún hafði mjög gott sjónminni og var eldklár. Hún var alltaf mjög réttsýn og þoldi aldrei neitt óréttlæti gagnvart þeim sem minna máttu sín. Ólöf Tara stundaði fimleika til margra ára, kenndi hóptíma í World Class og þjálfaði. Hún fékk sjaldgæfa bakteríu árið 2017 sem reyndist henni erfið og var hún í lyfjameðferðum í 2 ár. Þau veikindi ásamt því að vera í ofbeldissambandi varð til þess að hún fór að einbeita sér að þjálfun fyrir konur, sérsniðna til að valdefla þær. Á þeim stutta tíma sem Ólöf Tara starfaði í aktivismanum kom hún mörgum þröfum breytingum á stað, vakti athygli á málstaðnum og lét í sér heyra á þann hátt sem ekki hefur áður heyrst.
Ólöf Tara var stjórnarkona og ein af stofnendum Öfga. Öfgar var róttækur baráttuhópur gegn kynbundnu ofbeldi sem hlaut mannúðarverðlaun frá Siðmennt fyrir starf sitt árið 2022 ásamt því að fá Perluna verðlaun frá Mannréttindaskrifstofu Íslands fyrir eflingu mannréttinda árið 2022. Á árlegum samráðsfundi um jafnréttimál á vegum Kvenréttindafélagi Íslands héldu Öfgar fyrirlestur um Sögu þolenda - hina raunverulegu slaufun þar sem kvennasagan var sett í samhengi við samtímann með það að markmiði að gefa öllum þolendum okkar tíma pláss í umræðunni. Þá tóku Öfgar þátt í að skrifa Skuggaskýrslu Íslands um framkvæmd kvennasáttmálans um afnám allra mismununar gegn konum í samráði við Mannréttindaskrifstofu Íslands, Kvenréttindafélagi Íslands, UN Women Íslandi og ÖBÍ. Þá hittu fulltrúar Evrópuráðsins sem fylgja eftir Istanbúlsamningnum um forvarnir og baráttu gegn ofbeldi gegn konum og heimilisofbeldi og ávörpuðu Sameinuðu þjóðirnar um kvennasáttmálann.
Ólöf Tara fundaði með lögreglu og þingmönnum til að bæta stöðu þolenda og styðja við úrbætur m.a í tengslum við byrlanir og stöðu þolenda í réttarkerfinu. Í gegn um starf sitt hjá Öfgum mætti hún í fjölmörg viðtöl hjá bæði íslenskum og erlendum miðlum bæði í sjónvarpi og fréttamiðlum. Vinna Ólafar Töru í málefnum brotaþola var þrotlaus í gegn um árin, tók hún þátt í skipulagningu mótmæla og skrifaði fjölmargar yfirlýsingar til stuðnings þolenda.
Þann 9. október 2024 skipulagði hún seinasta stóra viðburðinn sinn þar sem haldin var kertavaka fyrir konur sem látist hafa vegna afleiðinga ofbeldis. Þar flutti Ólöf Tara mikilvæga ræðu um stöðu kvenna sem lifa við ofbeldi og algengi kvenmorða á Íslandi.